محمد الشاهد يكتب : ثق بنفسك ومتضعفش
الحياة مليانة محطات، وكل محطة فيها قصة ودروس بتتكتب في قلوبنا قبل ما تتكتب في عقولنا. بنقابل ناس كتير، في اللي يدخل حياتنا زي النسمة، يسيب فرحة وذكريات حلوة، وفي اللي وجوده يوجعنا اكتر مما يفرحنا. بنفرح باللي يقرب، ونستغرب من اللي يبعد، ونتوجع من اللي يخون او يجرح. لكن وسط كل ده، لازم نفتكر دايما ان قيمتنا مش بتتحدد باللي يفضل ولا باللي يسيب. قيمتنا جوانا، جوانا قوة اكبر من اي غياب واكبر من اي خذلان.
ساعات تلاقي شخص كان اقرب ليك، فجأة عملك بلوك وكأنه بيقولك “مش عايزك في حياتي”. وساعات تانية تلاقي حد بيقرر يختفي من غير وداع. اللحظة دي ممكن تكسر القلب وتسيب اسئلة من غير اجابة. بس الحقيقة ان اللي بيبعد مش بيختفي من جوه قلبه بسهولة. بالعكس، في اغلب الاحيان بيكون اكتر واحد بيراقبك، وبيتابع خطواتك في الخفاء. بيشوف صورك، نجاحك، ابتسامتك اللي رغم غيابه لسه منورة وشايلة قوة.
واللي زعلك او قلل منك في يوم من الايام، هيرجع في لحظة ضعف هو اللي مكسور فيها، ساعتها بس هيعرف قد ايه كان غالي وجودك. هيكتشف انك مشيت لقدام، وانه هو اللي اتأخر. وفي اللحظة دي، هتعرف انك كنت على حق لما ما ضعفتش ولا فقدت ثقتك بنفسك.
اما اللي اذاك، فالحياة مش بتنسى. الاذى بيرجع لاصحابه مضاعف. مش لانك تدعي عليهم او تتمنى لهم شر، لكن لان قانون الحياة كده: “كما تدين تدان”. اللي يوجع غيره هيتوجع، واللي يكسر قلب حد هيتكسر قلبه. وانت؟ كل اللي مطلوب منك انك تمشي بخطوات ثابتة، واثق ان ربنا مش هيسيب حقك يضيع.
الحياة بتعلمنا ان مفيش خروج نهائي. كل اللي يبعد بيرجع، بس بيرجع في الوقت اللي تكون انت خلاص مش محتاج وجوده. بيرجعوا لما يشوفوك واقف على رجلك، مبتسم، عايش حياتك من غيرهم. وهنا الفرق الكبير: لما يختاروا يرجعوا، انت اللي معاك القرار. انت اللي تحدد: هل يستحقوا فرصة تانية؟ ولا خلاص الطريق كمل من غير رجوع؟
خلي عندك يقين ان التجارب الصعبة مش نهايات، لكنها بدايات جديدة. كل مرة اتخذلت فيها، انت كسبت درس. كل مرة اتوجعت فيها، انت كسبت قوة. وكل مرة مشيت فيها لوحدك، انت اثبت لنفسك انك مش ضعيف.
الثقة بالنفس مش كلام بنقوله، الثقة بالنفس هي انك تصحى كل يوم وتبص لنفسك في المراية وتعرف انك تستحق. تستحق الحب، تستحق الاحترام، تستحق النجاح. ومهما حاولوا يقللوا منك، قيمتك ثابتة ومش بتتهز.
خلي قلبك في سلام. السلام الداخلي هو اعلى درجات القوة. لما تبقى راضي بنفسك وباللي انت فيه، محدش يقدر يعكر صفوك. وهتكتشف ان اللي راحوا مش خسارة، وان اللي موجودين النهاردة هم فعلا اللي بيستحقوا.
وافتكر دايما: مفيش حد بيطلع من حياتك بشكل نهائي. الكل بيرجع، لكن بيرجعوا مختلفين. وانت كمان بتكون مختلف. بتكون اقوى، انضج، واعي، وقادر تمشي في طريقك وانت عارف قيمتك. ساعتها هتعرف انك كنت محتاج كل التجارب دي عشان توصل للشخص اللي انت عليه دلوقتي.
ثق بنفسك. متضعفش. خليك دايما عارف انك قادر تكمل مهما كان. واللي يستحق وجودك مش هيسيبك، واللي يسيبك هو الخسران.
سلاما لقلبك حتى القاه.
